Դեսպան Հրաչյա Փոլադյանի հանդիպումը Եգիպտոսի բարձրագույն կրթության և գիտական հետազոտությունների նախարար Խալիդ Աբդել Ղաֆֆարի հետ

08 փետրվարի, 2022

Փետրվարի 8-ին Եգիպտոսում ՀՀ դեսպան Հրաչյա Փոլադյանը հանդիպել է Եգիպտոսի բարձրագույն կրթության և գիտական հետազոտությունների նախարար Խալիդ Աբդել Ղաֆֆարի հետ։ Հանդիպմանը ներկա է գտնվել նաև համալսարանների հարցերով փոխնախարար, դոկտոր Այման Աշուրը։

Շնորհավորելով դեսպանին նշանակման կապակցությամբ՝ նախարարը նշեց, որ Եգիպտոսը շահագրգռված է Հայաստանի հետ հարաբերությունների զարգացմամբ կրթական ոլորտում, և այս հարցում նա անձամբ պատրաստ է ցուցաբերել անհրաժեշտ աջակցությունը։

Զրույցի ընթացքում քննարկվեցին բարձրագույն կրթության բնագավառում երկկողմ համագործակցության հեռանկարները և գերակա ուղղությունները։ Երկուստեք կարևորվեցին իրավապայմանագրային բազայի ընդլայնումը և Կահիրեի համալսարանի հայագիտության կենտրոնի գործունեությունը։ Արծարծվեց հայկական և եգիպտական բուհերի միջև ուսանողների փոխանակման ծրագրերի մշակման հնարավորությունը։ Դեսպան Հր. Փոլադյանն ընդգծեց, որ հայկական բուհերի մոտ նկատվում է Եգիպտոսի բուհերի հետ ավելի սերտ համագործակցության ցանկությունը։

Զրուցակիցներն անդրադարձ կատարեցին նաև հայկական և եգիպտական բարձրագույն կրթական հաստատությունների կողմից տրվող դիպլոմների փոխճանաչման հարցին։ Զրույցի ավարտին դեսպանը և նախարարը պայմանավորվածություն ձեռք բերեցին համատեղ սերտ համագործակցության շնորհիվ աջակցել հայ-եգիպտական հարաբերությունների զարգացմանը կրթական բնագավառում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր