Հայաստանի դեսպանի հոդվածը՝ եգիպտական «ալ-Ահրամ» թերթում

12 մարտի, 2013

Եգիպտոսի ամենահեղինակավոր օրաթերթում` «ալ–Ահրամ»–ում լույս է տեսել այդ երկրում Հայաստանի դեսպան Արմեն Մելքոնյանի հեղինակած հոդվածն` ի պատասխան նույն թերթում տեղ գտած մի հրապարակման, որտեղ աղավաղված են ներկայացվել Լեռնային Ղարաբաղի հիմնահարցը, ինչպես նաեւ Խոջալուի դեպքերը։

Դեսպան Ա. Մելքոնյանը, մասնավորապես, պարզաբանել է, որ Խոջալուի վերաբերյալ ադրբեջանական քարոզչությունը նպատակ ունի մոլորեցնելով միջազգային հանրությանը խուսափել Սումգայիթում, Բաքվում, Կիրովաբադում, Մարաղայում եւ այլուր իրականացրած հայերի ջարդերի եւ էթնիկ զտումների համար պատասխանատվությունից: Ներկայացնելով Խոջալուի մասին ճշմարտությունը` նա ուշադրություն է հրավիրել այն փաստի վրա, որ այն ադրբեջանցիները, ովքեր համարձակվել են կասկածի տակ առնել Բաքվի պաշտոնական տեսակետը, այս կամ այն կերպ հետագայում պատժվել են, ինչպես նախկին նախագահ Ա. Մութալիբովը, լրագրող Ա.Ֆաթուլաեւը կամ լուսանկարիչ Չ.Մուստաֆաեւը:

Դեսպանը նշել է, որ ԼՂ հակամարտությունն Ադրբեջանի կողմից Արցախի ժողովրդի ինքնորոշման իրավունքը մերժելու եւ խնդիրը բիրտ ուժի կիրառմամբ լուծելու ցանկության արդյունքն է: Անդրադառնալով ադրբեջանցիների կողմից շահարկվող ՄԱԿ–ի ԱԽ բանաձեւերին` նա պարզաբանել է, որ դրանց գլխավոր նպատակը եղել է ռազմական գործողությունների դադարեցումը եւ խաղաղ բանակցությունների մեկնարկը, ինչը ժամանակին խուսափել է իրականացնել հենց Ադրբեջանը:

Հոդվածագիրն ընդգծել է նաեւ Հայաստանի Հանրապետության հանձնառությունը` ԵԱՀԿ Մինսկի խմբի համանախագահների միջնորդությամբ միջազգային իրավունքի սկզբունքների հիման վրա իրականացվող բանակցային գործընթացին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր