ՀՀ Անկախության 20-ամյակի տոնակատարությունը Եգիպտոսում

22 սեպտեմբերի, 2011

Հայաստանի Հանրապետության Անկախության 20-ամյակի կապակցությամբ ս.թ. սեպտեմբերի 22-ին Կահիրեում ՀՀ դեսպանությունում տեղի է ունեցել պաշտոնական ընդունելություն: Մոտ 800 հյուրերի թվում էին Եգիպտոսի Արաբական Հանրապետության առողջապահության նախարարը, արտաքին գործերի, մշակույթի, կրթության փոխնախարարները, այլ նախարարությունների և գերատեսչությունների պատասխանատու պաշտոնյաներ, Կահիրեում հավատարմագրված ավելի քան 60 երկրների դեսպաններ և դիվանագետներ, անվանի հասարակական-քաղաքական գործիչներ, գործարարներ, արվեստագետներ, լրագրողներ:
ՀՀ Անկախության տոնը շնարհավորելու էին եկել նաև Եգիպտոսի Հայոց առաքելական և կաթողիկե համայնքների հոգևոր առաջնորդները, Կահիրեի և Ալքեսանդրիայի թեմական և քաղաքական ժողովների ղեկավարները, հայ համայնքի բազմաթիվ անդամներ և Եգիպտոսում բնակվող ՀՀ քաղաքացիներ:
Ելույթ է ունեցել Եգիպտոսում ՀՀ դեսպան Արմեն Մելքոնյանը: Նա խոսել է անկախության` որպես հայ ժողովրդի դարավոր իղձերի և երազաքների իրականացման մասին, անդրադարձել անցած 20 տարիների ընթացքում Հայաստանի ձեռքբերումներին ու հաջողություներին, առկա մարտահրավերներին, ինչպես նաև հայ-եգիպտական համագործակցության խնդիրներին՝ կարևորելով հայ համայնքի դերակատարությունը երկու երկրների միջև բարեկամական հարաբերությունների սերտացման գործում:
Ընդունելության ընթացքում ճարտարապետ Նաիրի Համբիկյանին, հնագետ Հուրիկ Սուրուզյանին և քանդակագործ Սարգիս Թոսունյանին են հանձնվել ՀՀ Մշակույթի նախարարի պատվոգրերը՝ հայ մշակույթի զարգացման և հանրահռչակման գործում ունեցած նշանակալից ավանդի համար:
Նախօրեին` սեպտեմբերի 21-ին, Կահիրեում ՀՀ դեսպանություն էր այցելել ԵԱՀ Զինված Ուժերի Գերագույն Խորհրդի ղեկավար, մարշալ Մուհամեդ Հուսեյն Տանտավիի անձնական ներկայացուցիչ Քարիմ Էլ-Դիվանին, որը Հայաստանի Հանրապետության Անկախության 20-ամյակի առթիվ ՀՀ դեսպան Ա.Մելքոնյանին էր փոխանցել այդ երկրի ղեկավարի ջերմագին շնորհավորանքները և բարեմաղթանքները` ուղղված ՀՀ նախագահ Սերժ Սարգսյանին և բարեկամ հայ ժողովրդին:
Հանդիպման ընթացքում կողմերը գոհունակություն էին արտահայտել հայ-եգիպտական ջերմ հարաբերությունների ներկա մակարդակից, նշելով, որ դրանց հիմքում ընկած են երկու ժողովուրդների ավանդական բարեկամությունն ու փոխադարձ հարգանքը:
ՀՀ Անկախության 20-ամյակին են անդրադարձել եգիպտական ԶԼՄ-ները: Մասնավորապես, այդ կապակցությամբ «Ալ-Ահրամ ալ-Արաբի» շաբաթաթերթը տպագրել է դեսպան Ա.Մելքոնյանի հարցազրույցը: Մերձավոր Արևելքի հնագույն և ամենալայն տարածում ունեցող անգլալեզու «The Egyptian Gazette» օրաթերթի սեպտեմբերի 21-ի համարում մեկ ամբողջական տպագրական էջ տրամադրվել է Հայաստանին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր