ՀՀ սփյուռքի նախարարությունում կայացավ Պերճ Թերզյանին ՀՀ նախագահի պարգևի հանձնման հանդիսավոր արարողությունը

07 նոյեմբերի, 2011

Նոյեմբերի 7-ին ՀՀ սփյուռքի նախարարությունում կայացավ եգիպտահայ ականավոր գործիչ, գրող, հրապարակախոս, «Արեգ» պարբերականի խորհրդատու խմբագիր Պերճ Թերզյանին ՀՀ նախագահի պարգևի հանձնման հանդիսավոր արարողությունը:

ՀՀ սփյուռքի նախարար Հրանուշ Հակոբյանը համառոտ ներկայացրեց Պերճ Թերզյանի հասարակական, ստեղծագործական, լրագրողական գործունեությունը` ընդգծելով ականավոր գործչի մարդկային բարձր որակները: 1957թ. Պ.Թերզյանը ակտիվ մասնակցություն և կարևոր դերակատարություն ունի Եգիպտոսի հայ համայնքի կյանքում: Նա պատասխանատու պաշտոններ է զբաղեցրել ՀԲԸՄ մարմիններում, 1957 թվականից անդամակցել է Կահիրեի Հայ Գեղարվեստասիրաց միությանը, 1975 թվականին եղել է միության փոխատենապետը: Պերճ Թերզյանը երկու մենագրության հեղինակ է, 1977 թվականից «Արև» օրաթերթի աշխատակից, 1998-2009թթ. «Արև», իսկ 2010թ. ապրիլից` «Արեգ» արաբալեզու ամսագրերի հայկական նյութերի խորհրդատու խմբագիր: Պ. Թերզյանն «Արևի» էջերում 1970-ական թվականների վերջերից հաճախ հանդես է եկել ազգային ու միջազգային թեմաների վերաբերող հրապարակումներով:

ՀՀ Նախագահ Սերժ Սարգսյանի հրամանագրով Հայաստանի Հանրապետության անկախության 20-րդ տարեդարձի առթիվ, հայապահպանության գործում ներդրած ծանրակշիռ ավանդի, Հայրենիքին մատուցած ծառայությունների, ինչպես նաև Հայաստանի Հանրապետության և օտարերկրյա պետությունների միջև բարեկամության ամրապնդմանը մեծապես նպաստելու համար Պերճ Թերզյանը պարգևատրել է Մխիթար Գոշի մեդալով:

Հանձնելով ՀՀ Նախագահի պարգևը` նախարար Հ.Հակոբյանը բարձր գնահատեց Պ.Թերզյանի դերակատարությունը Եգիպտոսի հայ համայնքում և ընդգծեց նրա անմնացորդ նվիրումը ազգային խնդիրների լուծման գործին:

Բարձր պարգևի արժանանալու առթիվ Պ.Թերզյանին շնորհավորեցին և երախտագիտության խոսքեր ասացին միջոցառմանը ներկա Հայ Առաքելական Եկեղեցու Եգիպտոսի Հայոց թեմի (նաև Եթովպիայի, Սուդանի և Հարավային Աֆրիկայ) առաջնորդ Աշոտ եպիսկոպոս Մնացականյանը, ԳԱԱ պատմության ինստիտուտի տնօրեն Աշոտ Մելքոնյանը, ՀԲԸՄ հայաստանյան ներկայացուցչության փոխտնօրեն Հովիկ Յորդեկյանը և այլք:

Շնորհակալություն հայտնելով ՀՀ Նախագահին և ՀՀ սփյուռքի նախարարին բարձր պարգևի համար, ինչպես նաև ներկաներին` երախատագիտության խոսքերի և ջերմ բարեմաղթանքների համար` Պ.Թերզյանը նշեց, որ բախտավոր է` տեսնել Հայաստանի անկախությունը, տոնել Հայաստանի անկախության 20-ամյակը և զգալ Սփյուռքի նկատմամբ պետական հոգածություն: Նա մաղթեց, որ Հայաստանը լինի առավել զորավոր, առաջավոր ու կենսունակ և հաղթահարի բոլոր դժվարությունները:

Աղբյուր՝ ՀՀ սփյուռքի նախարարություն

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր