ՀՀ սփյուռքի նախարարի այցը Եգիպտոս

13 հունիսի, 2010

Հունիսի 13-ին ավարտվեց ՀՀ սփյուռքի նախարար Հրանուշ Հակոբյանի եռօրյա այցը Եգիպտոսի Արաբական Հանրապետություն։

Նախարար Հ.Հակոբյանը Կահիրեի և Ալեքսանդրիայի Հայոց Ազգային Առաջնորդարաններում, ինչպես նաև Կահիրեի Հայ Կոթաղիկե Առաջնորդարանում հանդիպեց եգիպտահայ համայնքի ներկայացուցիչների հետ: Նա ներկայացրեց ՀՀ սփյուռքի նախարարության գործունեությունը, կատարած աշխատանքները, առաջիկա ծրագերը, Հայրենիք-Սփյուռք գործակցության հեռանկարները և պատասխանեց եգիպտահայերի հարցերին։

ՀՀ դեսպանությունում տիկին Հ.Հակոբյանն հանդիպումներ ունեցավ ՀԲԸՄ Եգիպտոսի շրջանակային խորհրդի և եգիպտահայ «Արև», «Հուսաբեր» և «Ջահակիր» մշակութային միությունների ղեկավար կազմի հետ։ Նախարարն այցելեց Կահիրեի հայկական ակումբներ՝ տեղում ծանոթանալու և շփվելու եգիպտահայության հետ։

Ալեքսանդրիայի հռչակավոր գրադարանում նախարար Հ.Հակոբյանը մասնակցեց գրադարանի տնօրինության կազմակերպած Եգիպտոսի առաջին վարչապետ, հայազգի նշանավոր քաղաքական և պետական գործիչ Նուբար Փաշայի (1825-1899թթ.) հուշերի արաբերեն հրատարակության շնորհանդեսին: Այստեղ նախարարը հանդես եկավ ողջույնի խոսքով` բարձր գնահատելով Նուբար Փաշայի դերը Եգիպտոսի նորագույն շրջանի պատմության մեջ, ինչպես նաև հայ-եգիպտական դարավոր բարեկամության ջերմացման գործում` բնորոշելով նրան որպես հայ-եգիպտական բարեկամության խորհրդանիշ։

Ալեքսանդրիայում նախարարն այցելեց Եգիպտոսում ՀՀ և ՌԴ դեսպանությունների համատեղ ջանքերով Ռուսական մշակութային կենտրոնում նախօրեին բացված 10 հայ արվեստագետների գեղանկարչական ցուցահանդես:

Այցի վերջին օրը ՀՀ սփյուռքի նախարարին ընդունեց Եգիպտոսի արտաքին գործերի նախարար Ահմեդ Աբուլ Ղեյտը։ Զրուցակիցները երկուստեք գոհունակությամբ փաստեցին հայ եգիպտական հարաբերությունների բարձր մակարդակը: Քննարկվեցին Եգիպտոսում հայկական Սփյուռքի դերի և նշանակությանը վերաբերող հարցեր, ինչպես նաև առաջիկայում Աբուլ Ղեյտի՝ Հայաստան կատարելիք այցի մանրամասներ։ Նախարար Աբուլ Ղեյտը բարձր գնահատեց եգիպտահայ համայնքի դերակատարությունը Եգիպտոսի ներքին կյանքում, ինչպես նաև հայ-եգիպտական բարեկամական կապերի առավել ամրապնդման գործում։

Այցի ընթացքում նախարար Հրանուշ Հակոբյանին ուղեկցում էր Եգիպտոսում ՀՀ արտակարգ և լիազոր դեսպան Արմեն Մելքոնյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր