Մելքոնեան Մանկապարտէզի Ամավերջի Հանդէսը` Բովանդակալից եւ Ներկայանալի

26 մայիսի, 2012

Աղեքսանդրիա (Արմաւենի) — Պօղոսեան Ազգային Վարժարանի Մելքոնեան մանակապարտէզի ամավերջի հանդէսին, որ տեղի ունեցաւ Կիրակի Մայիս 20-ին, հրաժեշտ տուին 2 շրջանաւարտներ:

Ողջոյնի եւ շնորհաւորանքի խօսքով ելոյթ ունեցած է վարժարանի տնօրէնուհի Շուշան Կանիմեան, որ կը տեղեկացնէ, թէ «մանկապարտէզի ընդհանուր թիւը 2011-2012 տարեշրջանին 9 հոգի է», աւելցնելով, որ «հակառակ այս փոքր թիւին մեր աշակերտները բովանդակալից եւ ներկայանալի ելոյթ մը ունեցան»:

Այս տարի նորութիւն էր երեխաներու ներկայացումը, երբ աշակերտներէն Սեւակ Կորտեան ստանձնած էր Մեսրոպ Մաշտոցի դերը եւ փոքրիկները շուրջը հաւաքելով անոնց հարցուցած է Հայոց այբուբենի ստեղծման մասին, ապա բոլորը միասին «Այբ Բեն Գիմ» երգած են:

«Ներկաներուն կողմէ շատ սիրուեցաւ նաեւ արեւածաղիկի մասին երգը, որ կատարեցին Ծաղիկ դասարանի աշակերտուհիներ Քարին Պուլես եւ Արեւ Վարձպետեան»:

Հանդէսի վերջաւորութեան հնչած է մանկապարտէզի հրաժեշտի երգը, հանձնուած են վկայագրեր, որմէ ետք խօսք առած է Հոգշ. Տ. Գաբրիէլ Աբղ. Սարգսեանը:

«Հանդէսին ներկայ էին մօտ 80 հոգի», կ’ըսէ տնօրէնուհի Կանիմեան, «Աղեքսանդրիոյ Առաջնորդական Փոխանորդ Տէր Գրիգոր Քահանայ Մուրատեան, Քաղաքական Ժողովի Ատենապետ տէր եւ տիկին Մուշեղ Պասմաճեան, ծնողներ եւ հիւրեր»:

Կոկոն դասարանի պատասխանատու ուսուցչուհին է Ռիթա Փափազեան, իսկ Ծաղիկ դասարանինը` Նուարդ Մարտիկեան: Հանդէսի ընդհանուր պատասխանատուն էր Մարիա Հալաճեան եւ դաշնամուրով երգերուն ընկերակցեցաւ Կարի Պոհճալեան:

Օրուան նախագահն էր տէր եւ տիկին Հրանդ Վարձպետեան: Հանդէսը տեղի ունեցած է հովանաւորութեամբ Եգիպտոսի Հայոց Թեմի Առաջնորդ Գերշ. Տէր Աշոտ Ս. Եպս. Մնացականեանի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր