Կոկանեան Սրահի անուշեղէններու տարեկան պազար

11 դեկտեմբերի, 2011

Գահիրէ (Արմաւենի) - Կիրակի Դեկտեմբեր 11-ին, Կոկանեան Սրահի կազմակերպած անուշեղէններու տարեկան պազարը «յաջող էր, քանի որ թէ' ներկաները գոհ էին եւ թէ' ցուցադրուած բոլոր ապրանքները վաճառուեցան», կ'ըսեն կազմակերպողները:

«Պազարին, մանթըյի աւանդական սպասարկութեան եւ նուէրներու խաղարկութեան ներկայ եղած են մօտ 145 հոգի,» կը տեղեկացնէ ակումբի վարչական եւ տիկնանց յանձնախումբի անդամ Լալա Նիկոլեան:

Այս տարուան անուշապազարին նորութիւն էր` Նիկոլեանի ձեռամբ գծուած ու պատրաստուած Կաղանդի շնորհաւորական բացիկներ ինչպէս նաեւ յատուկ կերպով փաթաթուած շոքոլայի ամաններ: «Հիւրասիրութան սեղաններն ալ զարդարուած էին Գարին Աւագեանի կողմէ պատրաստուած հրեշտակներով, որոնց ամէն մէկուն վրայ բարեմաղթանք մը գրուած էր գալիք տարուան համար», կ'ըսէ Նիկոլեան:

Փոքրիկներուն այցելեց նաեւ Կաղանդ Պապան` ու ամէն մէկուն հետ նկարուեցաւ, «իսկ վերջաւորութեան այդ նկարները իբր նուէր բաժնուեցան երեխաներուն», կը տեղեկացնէ Նիկոլեան, մեկնաբանելով, «որ Կաղանդ պապային հետ նկարը աւելի յիշատակելի գտանք»:

Ցերեկոյթի աւարտին, աւանդական խաղարկութեան ընթացքին 16 նուէր բաժնուեցաւ, իսկ Նիկոլեան ողջունեց ներկաները` շնորհակալութիւն յայտնելով բոլոր մասնակիցներուն, կազմակերպիչներուն եւ տիկնանց յանձնախումբին` «յատկապէս երէց տիկիններուն, որ Սրահի սիւներն են եւ իրենց նուիրումով կանգուն կը պահեն հայկական ակումբները»:

Ներկաներու շարքին էին Եգիպտոսի Թեմի Առաջնորդ Գերաշնորհ Տէր Աշոտ Ս. Եպիսկոպոս Մնացականեան, Սուտանի Հոգեւոր Հովիւ՝ Տէր Գաբրիէլ Աբեղայ Սարգիսեան, Գահիրէի Հոգեւոր Հովիւ Տէր Յակոբ Քահանայ Յակոբեան, Եգիպտոսի մօտ ՀՀ Արտակարգ եւ Լիազօր Դեսպան Արմէն Մելքոնեան, Ա. Քարտուղար Արտակ Յովհաննիսեան, Գահիրէի Թեմական Ժողովի Ատենապետ Նուպար Սիմոնեան եւ Քաղաքական ժողովի Ատենապետ Օննիկ Պըլըքտանեան: Ձեռնարկը նախագահած է տիկին Կարինէ Տէօվլէթեան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր