Գահիրէի Թեմական եւ Քաղաքական Ժողովները Կը Կազմեն Նոր Դիւաններ

06 դեկտեմբերի, 2011

Գահիրէ (Արմաւենի) -- Գահիրէի Թեմական Ժողովը ընտրած է Նուպար Սիմոնեան որպէս ատենապետ եւ Կարպիս Եազըճեան որպէս փոխ-ատենապետ, մինչդեռ Քաղաքական Ժողովի ատենապետ ընտրուած է Օննիկ Պըլըքտանեան, իսկ փոխ-ատենապետ՝ Շանթ Կապէյեան, ըստ Գահիրէի Ազգային Առաջնորդարանի դիւանէն ստացուած էլէկտրոնային հաղորդագրութեան մը:

Ընտրութիւնները տեղի ունեցած են Դեկտեմբեր 5-ին, Գահիրէի մասնակի ընտրութեամբ համալրուած 24 անդամներէ բաղկացող Թեմական Ժողովի անդրանիկ նիստին ընթացքին, 19 երեսփոխաններու ներկայութեամբ, նշած է Դեկտեմբեր 6 թուակիր յայտարարութիւնը: «Զանազան պատճառներով որոշ երեսփոխաններ բացակայ էին», Եգիպտահայ Թեմի Առաջնորդ Գերաշնորհ Տէր Աշոտ Ս. Եպիսկոպոս Մնացականեան ըսած է «Արմաւենի»իին: «Անոնք նախապէս լուր տուած էին»:

Երեք անդամներէ բաղկացող Թեմականի դիւան ընտրուած է նաեւ Բժ. Սուրէն Պայրամեան որպէս ատենադպիր: Սիմոնեան փոխարինած է Անդրանիկ Մեսրոպեանին (1989-2011), որ մահկանացուն կնքած է անցեալ Մարտին:

Նոյն նիստին ընթացքին ընտրուած է 7 անդամներէ բաղկացող Քաղաքական Ժողովի նոր կազմը, որ իր կարգին, Սրբազան Հօր նախագահութեամբ գումարած է իր առաջին նիստը եւ ընտրած՝ իր դիւանը հետեւեալ կազմով.- Օննիկ Պըլըքտանեան (ատենապետ), Շանթ Կապէյեան (փոխ-ատենապետ), Պետրոս Մովսէսեան (ատենադպիր), Շահէն Մազլումեան (գանձապահ), Բժ. Արմէն Մազլումեան, Գառնիկ Կրպոյեան եւ Վահէ Բլատեան (խորհրդականներ):

«Ներկայիս Քաղաքական ժողովը պիտի գործէ մօտակայ երկու տարիներուն», կը տեղեկացնէ Սրբազան Հայրը: «Անոնք պարտաւոր են ծրագիր եւ պիւտճէ ներկայացնել Թեմական Ժողովին, յառաջիկայ ժողովին, որ տեղի պիտի ունենայ, հաւանաբար, Յունուարին»:

2009-2011 շրջանի Քաղաքական Ժողովը ունէր հետեւեալ կազմը.- Բժ. Գէորգ Երզնկացեան (ատենապետ), Բարսեղ Գըզըլեան (փոխ-ատենապետ), Վահէ Բլատեան (ատենադպիր), Մարտիկ Պալայեան (գանձապահ), Պետրոս Մխտիկեան, Շահէն Մազլումեան եւ Բժ. Արմէն Մազլումեան (խորհրդականներ):

Նեկտար Պալեան Յարութիւնեան

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր