Իրադարձություններ

«Թող 2012-ը Գործի Տարի Ըլլա'յ» -- Կ'ըսէ Եգիպտոսի Թեմի Առաջնորդը

01.01.2012

 Գահիրէ (Արմաւենի) -- Եգիպտոսի Հայոց Թեմի Առաջնորդ Գերաշնորհ Տէր Աշոտ Ս. Եպս. Մնացականեան իր շնորհաւորական մաղթանքները յղած է եգիպտահայ գաղութին եւ համայն հայութեան, յուսալով որ «գործի տարի ըլլայ 2012 տարին»:

 
 
«Թող 2012-ը գործի տարի ըլլայ եւ բոլորս մեր մասնակցութիւնը բերենք ազգային եւ համայնքային կեանքին», ըսած է Սրբազան Հայրը: «Ըլլանք միասնական եւ պատրաստ սատարելու իրարու եւ ձեռք-ձեռքի տուած՝ պայքարինք դժուարութիւններուն դէմ»:
 
«Վստահ եմ, որ այս ընթացքը հաճելի պիտի ըլլայ Աստուծոյ, եւ Աստուած իր օրհնութիւնը պիտի բաշխէ առատօրէն, խաղաղութիւնը պիտի սփռի ամէնուրէք, սէրը պիտի սերմանէ բոլորիս սրտերուն մէջ: Հոս է մեր ուժը եւ մեր յաջողութիւնը»:
 
Սրբազան Հայրը նոյնը կը փափաքի իւրաքանչիւր հայու «որ կ'ապրի մեր հայրենիքին մէջ ինչպէս նաեւ սփիւռքի»:
 
Իր բառերով, «Հայրենիքն ալ կը կարօտի նուիրեալ եւ ազնիւ հայորդիներու օգնութեան ու գործուն մասնակցութեան` պետական ազգային կեանքէն ներս: Թող Աստուած շէն պահէ մեր երկիրը, անսասան` պետականութիւնը, խաղաղ ու սիրոյ մէջ` ժողովուրդը, որպէսզի իւրաքանչիւր հայորդիի բարեմաղթանք իրականանայ, տեսանելի ըլլայ, շոշափելի դառնայ»:
 
Տէր Աշոտ իր մաղթանքներուն մէջ կը շեշտէ գործի արժէքը: «Ամէն անգամ նոր տարուան շեմին, բարի մաղթանքներով կը սկսինք եւ կը շարունակենք մեր կեանքը, սակայն միայն մաղթանքներով չէ, որ նոր տարին յաջող անցնի: Հետեւաբար կը փափաքինք, որ 2012-ը տարբեր ըլլայ բոլորիս համար` տարբեր թէ' մեր մտածումներով, թէ' մաղթանքներով, թէ' գործերով: Եւ տարբերութիւնն այն է, որ ինչ որ կը մաղթենք եւ կը փափաքինք միեւնոյն ատեն գործով յաջողցնենք ատոնց իրականացումը»:
 
Տէր Աշոտ Եպիսկոպոս Մնացականեան եղած է Եգիպտոսի թեմի առաջնորդ 2005-ին: 
ՀՀ ԱԳՆ
պաշտոնական կայք
Երկքաղաքացիություն Էլեկտրոնային
վիզա
Արտոնագրի
ձևեր